ஸ்பெயின், பிரான்சில் காட்டுத்தீ தீவிரம் 2.70 லட்சம் பேர் பாதிப்பு

ஐரோப்பிய நாடுகளான ஸ்பெயின் மற்றும் பிரான்சில் பரவி வரும் காட்டுத்தீ காரணமாக ஆயிரக்கணக்கான ஹெக்டேயர் வனப்பகுதிகள் தீக்கிரையாகியுள்ளதுடன், சுமார் 2 லட்சத்து 70 ஆயிரம் பேர் பாதிக்கப்பட்டுள்ளதாக தகவல்கள் தெரிவிக்கின்றன.

ஸ்பெயின் தலைநகர் மாட்ரிட், அவிலா, குவாதலஹாரா உள்ளிட்ட பகுதிகளிலும், பிரான்சின் தெற்கு மற்றும் தென்மேற்கு பிராந்தியங்களிலும் காட்டுத்தீ தொடர்ந்து வேகமாக பரவி வருகிறது. அதிக வெப்பநிலை, வறண்ட காலநிலை மற்றும் பலத்த காற்று காரணமாக தீயை கட்டுப்படுத்துவதில் சிரமம் நிலவுவதாக அதிகாரிகள் தெரிவித்துள்ளனர்.

பாதுகாப்பு கருதி ஆயிரக்கணக்கான மக்கள் தங்களது வீடுகளிலிருந்து பாதுகாப்பான இடங்களுக்கு வெளியேற்றப்பட்டுள்ளனர். தீயை கட்டுப்படுத்தும் பணியில் தீயணைப்பு வீரர்கள், அவசரகால மீட்புப் படையினர் மற்றும் விமானங்கள் ஈடுபடுத்தப்பட்டுள்ளன.

காட்டுத்தீயால் போக்குவரத்து மற்றும் அன்றாட இயல்பு வாழ்க்கையும் பாதிக்கப்பட்டுள்ள நிலையில், தீ பரவலை கட்டுப்படுத்த அதிகாரிகள் தீவிர நடவடிக்கைகளை முன்னெடுத்து வருகின்றனர்.