இம்ரான் கானை விடுதலை செய்யக் கோரி பேரணி – பாகிஸ்தானில் அதிகரிக்கும் அரசியல் பதற்றம்!

சிறையில் அடைக்கப்பட்டுள்ள பாகிஸ்தானின் முன்னாள் பிரதமர் இம்ரான் கானை விடுதலை செய்யக் கோரி, அவரது ஆதரவாளர்கள் இஸ்லாமாபாத்தை நோக்கித் தொடர்ந்து முன்னெடுத்து வரும் நீண்ட பேரணியால் அந்நாட்டில் அரசியல் பதற்றம் அதிகரித்துள்ளதாகத் தெரிவிக்கப்படுகிறது.

பாதுகாப்புக் கட்டுப்பாடுகள் மற்றும் பயணப் பாதைகளில் ஏற்பட்ட மாற்றங்களுக்கு மத்தியிலும், கைபர் பக்துன்க்வா மாகாண முதலமைச்சர் சோஹைல் அஃப்ரிடி தலைமையிலான இந்தப் பேரணி, ஐந்தாவது நாளில் பெஷாவரைச் சென்றடைந்துள்ளதாகத் தகவல்கள் தெரிவிக்கின்றன.

இந்நிலையில், தொடர்ச்சியான போராட்டங்கள் நாட்டின் வர்த்தகம் மற்றும் உற்பத்தித் துறைகளுக்குப் பாதிப்பை ஏற்படுத்துவதுடன், ஏற்கனவே பலவீனமான நிலையில் உள்ள பாகிஸ்தானின் பொருளாதாரத்தையும் மேலும் பாதிக்கக்கூடும் எனப் பிரதமர் ஷெபாஸ் ஷெரீப் எச்சரிக்கை விடுத்துள்ளார்.

இம்ரான் கானின் விடுதலையை வலியுறுத்தி ஆதரவாளர்கள் முன்னெடுத்து வரும் இந்தப் போராட்டங்கள், பாகிஸ்தானின் அரசியல் மற்றும் பொருளாதார நிலைமைகள் குறித்த கவலைகளை மேலும் அதிகரித்துள்ளன.