இரத்மலானையில் வீடு மீது கைக்குண்டு தாக்குதல்; பாதாள உலகக் குழு தொடர்பில் விசாரணை தீவிரம்

இரத்மலானை, ஸ்ரீ ஞானேந்திரா வீதியில் அமைந்துள்ள இருமாடி வீடொன்றின் மீது அடையாளம் தெரியாத நபர்கள் இரண்டு கைக்குண்டுகளை வீசிய சம்பவம் தொடர்பில் காவல்துறை தீவிர விசாரணைகளை முன்னெடுத்து வருகிறது.

வீசப்பட்ட இரண்டு கைக்குண்டுகளில் ஒன்று வெடித்துள்ள நிலையில், மற்றொன்று வெடிக்காமல் வீட்டுத் தோட்டத்தில் கிடந்ததாக ஆரம்பகட்ட விசாரணைகளில் தெரியவந்துள்ளது. இந்தத் தாக்குதலில் வீட்டின் இரண்டு ஜன்னல் கண்ணாடிகள் மட்டுமே சேதமடைந்துள்ளதுடன், உயிர்ச்சேதம் எதுவும் பதிவாகவில்லை.

சம்பவம் தொடர்பில் பாதாள உலகக் குழுக்களின் தொடர்பு இருக்கக்கூடும் என்ற கோணத்திலும் விசாரணைகள் மேற்கொள்ளப்பட்டு வருகின்றன.

தாக்குதலுக்குள்ளான வீட்டின் உரிமையாளர், தற்போது வெளிநாட்டில் வசித்து வருவதாகக் கூறப்படும் ரஸல் அலோசியஸ் ஸ்மித்தின் தந்தையின் சகோதரரின் மகன் என காவல்துறை தெரிவித்துள்ளது.

மேலும், ரஸல் அலோசியஸ் ஸ்மித், பாதாள உலகக் குழுத் தலைவர்களாகக் கருதப்படும் 'அஞ்சு' என அழைக்கப்படும் சிங்ஹார அமல் ஷமிந்த சில்வா மற்றும் 'தர்மே' எனப்படும் எல்லாவல லியனகே தர்மசிரியுடன் நெருங்கிய தொடர்பில் இருந்ததாகவும், பின்னர் 'அஞ்சு'வுடன் கருத்து வேறுபாடு ஏற்பட்டதாகவும் கிடைத்துள்ள தகவல்களின் அடிப்படையில் காவல்துறை மேலதிக விசாரணைகளை மேற்கொண்டு வருகிறது.