கோடிக்கணக்கான தங்க நகை கொள்ளை: மூன்று பெண்கள் உட்பட நால்வர் கைது

வீடு ஒன்றில் இடம்பெற்ற கோடிக்கணக்கான ரூபாய் மதிப்புள்ள தங்க நகை கொள்ளைச் சம்பவத்துடன் தொடர்புடைய மூன்று பெண்கள் மற்றும் ஒருவரை கல்கிசை குற்றப் புலனாய்வு பிரிவினர் கைது செய்துள்ளனர்.

கடந்த ஜூலை 18 ஆம் திகதி வீடு ஒன்றை உடைத்து, ஒரு கோடியே 41 இலட்சம் ரூபாய் (14.1 மில்லியன் ரூபாய்) பெறுமதியான தங்க ஆபரணங்கள் கொள்ளையிடப்பட்டதாக பொலிஸில் முறைப்பாடு பதிவு செய்யப்பட்டிருந்தது. இதையடுத்து கல்கிசை குற்றத்தடுப்பு பிரிவினர் விசாரணைகளை முன்னெடுத்தனர்.

விசாரணைகளின் அடிப்படையில், நேற்று (6) தெஹிவளை பகுதியில் இந்தக் கொள்ளைச் சம்பவத்துடன் தொடர்புடைய இரண்டு பெண் சந்தேகநபர்கள் கைது செய்யப்பட்டனர். மேலும், ஹட்டன் பத்தன பகுதியில் குற்றத்திற்கு ஒத்துழைப்பு வழங்கியதாகக் கூறப்படும் ஆண் ஒருவரும், பெண் ஒருவரும் பொலிஸாரால் கைது செய்யப்பட்டுள்ளனர்.

கைது நடவடிக்கையின்போது, திருடப்பட்டதாகக் கூறப்படும் 8 ஜோடி தங்கத் தோடுகள், 4 தங்கப் பதக்கங்கள், ஒரு தங்க வளையல், 10 தங்கச் சங்கிலிகள், ஒரு தங்கக் கைக்காப்பு மற்றும் 2 தங்க மோதிரங்கள் உள்ளிட்ட பல்வேறு நகைகள் பொலிஸாரால் மீட்கப்பட்டுள்ளன.

கைதானவர்களில் 28, 46 மற்றும் 53 வயதுடைய மூன்று பெண்களும், ஹட்டன் பத்தன பகுதியைச் சேர்ந்த 28 வயதுடைய ஆண் ஒருவரும் அடங்குவதாக பொலிஸார் தெரிவித்துள்ளனர்.

இந்தச் சம்பவம் தொடர்பில் கல்கிசை பொலிஸார் மேலதிக விசாரணைகளை மேற்கொண்டு வருகின்றனர்.