நடுவானில் குழந்தை பெற்ற 30 வயதான இலங்கைப் பெண்

திருகோணமலைப் பகுதியைச் சேர்ந்த 30 வயதான இந்தப் பெண், வீட்டுப் பணியாளராகப் பணிபுரிவதற்காக 2024-ஆம் ஆண்டு குவைத்திற்குச் சென்றிருந்தார்.  (19) அதிகாலை, அவர் குவைத் நகர விமான நிலையத்திலிருந்து 'ஜசீரா ஏர்வேஸ்' (Jazeera Airways) நிறுவனத்தின் J9-551 எண் கொண்ட விமானத்தில் பயணம் செய்து கொண்டிருந்தபோது, ​​அவருக்குப் பிரசவ வலி ஏற்பட்டது.

இதனைத் தொடர்ந்து, விமானத்தில் இருந்த பணியாளர்களின் உடனடி உதவியுடன், அவர் விமானத்திலேயே ஆண் குழந்தையைப் பெற்றெடுத்தார்.

இது குறித்து விமானி கட்டுநாயக்க விமான நிலைய அதிகாரிகளுக்குத் தகவல் தெரிவித்தார். விமானம் தரையிறங்கியதும், தாய்க்கும் குழந்தைக்கும் அவசர மருத்துவ சிகிச்சைகளை வழங்குவதற்காக, ஆம்புலன்ஸ் வசதியுடன் கூடிய மருத்துவக் குழுவினர் அங்கு தயார் நிலையில் இருந்தனர்.

தாய் மற்றும் பச்சிளம் குழந்தை இருவரும் நீர்கொழும்பு பொது மருத்துவமனையில் அனுமதிக்கப்பட்டுள்ளனர். அவர்கள் இருவரும் நல்ல உடல் நலத்துடன் இருப்பதாக மருத்துவமனை வட்டாரங்கள் தெரிவிக்கின்றன.