எரிபொருள் சந்தையில் முறையான தீர்வுகள் இல்லாவிட்டால் மீண்டும் வரிசைகள் உருவாகும் அபாயம் – அட்வொகாட்டா எச்சரிக்கை!

இலங்கையின் எரிபொருள் சந்தையில் நியாயமான போட்டிச்சூழலை உருவாக்குவதுடன், அரச மற்றும் தனியார் துறைகளுக்கு இடையிலான முரண்பாடுகளுக்கு உரிய பொருளாதார மற்றும் சட்டரீதியான தீர்வுகள் வழங்கப்படாவிட்டால், எதிர்காலத்தில் மீண்டும் எரிபொருள் வரிசைகள் உருவாகும் அபாயம் இருப்பதாக அட்வொகாட்டா (Advocata) நிறுவனத்தின் பிரதம நிறைவேற்று அதிகாரி தனநாத் பெர்னாண்டோ எச்சரித்துள்ளார்.

‘Advocata Plus’ ஊடாக முன்வைக்கப்பட்ட பொருளாதாரப் பகுப்பாய்வில் அவர் இதனைச் சுட்டிக்காட்டியுள்ளார்.

அரசியல் ரீதியான மேலோட்டமான அறிவிப்புகளுக்கு அப்பால் சென்று, இலங்கையின் பெட்ரோலியச் சந்தையில் காணப்படும் கட்டமைப்பு ரீதியான பிரச்சினைகளை அடையாளம் கண்டு, அவற்றுக்குத் தீர்வு காண்பது அரசாங்கத்தின் முக்கிய பொறுப்பாகும் என்றும் அவர் வலியுறுத்தியுள்ளார்.

சந்தையில் நிலவும் சமமற்ற போட்டிச்சூழல்

இலங்கை பெற்றோலியக் கூட்டுத்தாபனத்திற்கும் (CPC), சந்தையில் புதிதாக நுழைந்துள்ள சினோபெக் (Sinopec), லங்கா ஐஓசி (LIOC) உள்ளிட்ட தனியார் நிறுவனங்களுக்கும் இடையில் சமமான போட்டிச்சூழல் காணப்படவில்லை என தனநாத் பெர்னாண்டோ சுட்டிக்காட்டியுள்ளார்.

குறிப்பாக, கச்சா எண்ணெய் இறக்குமதிக்கான சுங்க வரி உள்ளிட்ட வரிகள் குறைவாக இருப்பதால், சப்புகஸ்கந்த எண்ணெய் சுத்திகரிப்பு நிலையத்தில் உற்பத்தி செய்யப்படும் எரிபொருளுக்கான வரிச்செலவு, நேரடியாக இறக்குமதி செய்யப்படும் சுத்திகரிக்கப்பட்ட எரிபொருளுக்கான செலவை விடக் குறைவாகக் காணப்படுகிறது.

உள்நாட்டு உற்பத்தி மூலம் சந்தையின் சுமார் 30 சதவீத எரிபொருள் தேவையையும், டீசல் தேவையில் 40 சதவீதத்தையும், 92 ஒக்டேன் பெற்றோல் தேவையில் 15 சதவீதத்தையும் பூர்த்தி செய்ய முடிவதாகக் குறிப்பிடப்பட்டுள்ளது.

இந்த வரி அனுகூலத்தால் கிடைக்கும் நன்மைகள் பெருமளவில் பெற்றோலியக் கூட்டுத்தாபனத்திற்கே கிடைப்பதாகவும் அவர் தெரிவித்துள்ளார்.

அரச நிறுவனங்களுக்கான விநியோகத்தில் ஏகபோக நிலை

விமான எரிபொருள் மற்றும் இலங்கை மின்சார சபை உள்ளிட்ட அரச நிறுவனங்களுக்கான உலை எண்ணெய் (Furnace Oil) விநியோகத்தில் பெற்றோலியக் கூட்டுத்தாபனம் ஏகபோக நிலையைப் பேணுவதாகவும் அவர் சுட்டிக்காட்டியுள்ளார்.

இந்தப் பிரிவுகளில் கிடைக்கும் அதிக வருமானத்தைப் பயன்படுத்தி சாதாரண டீசல் மற்றும் பெற்றோலைக் குறைந்த விலையில் விற்பனை செய்யும் வாய்ப்பு கூட்டுத்தாபனத்துக்கு இருப்பதாகவும், தனியார் நிறுவனங்களுக்கு இத்தகைய வாய்ப்பு இல்லையென்றும் அவர் குறிப்பிட்டுள்ளார்.

எரிபொருள் சேமிப்பு வசதிகளிலும் கட்டணச் சுமை

எண்ணெய் சேமிப்பு முனைய நிறுவனமான CPSTL இல் பெற்றோலியக் கூட்டுத்தாபனம் பெரும்பான்மை உரிமையைக் கொண்டிருப்பதால், தனியார் நிறுவனங்கள் தமது எரிபொருளைச் சேமித்து விநியோகிப்பதற்காக அதிகளவிலான கட்டணங்களைச் செலுத்த வேண்டியுள்ளதாகவும் தெரிவிக்கப்பட்டுள்ளது.

இத்தகைய கட்டமைப்பு, தனியார் நிறுவனங்களின் செயற்பாட்டுச் செலவுகளை அதிகரிப்பதுடன், சந்தையில் சமமான போட்டி நிலவுவதற்கும் தடையாக அமைவதாக அவர் சுட்டிக்காட்டியுள்ளார்.

தனியார் நிறுவனங்களின் இலாப வரம்பு தொடர்பான சிக்கல்

தனியார் நிறுவனங்களுடன் மேற்கொள்ளப்பட்ட ஒப்பந்தங்களின்படி, எரிபொருள் விற்பனையில் அதிகபட்சமாக 4 சதவீத இலாபத்தை மட்டுமே தக்கவைத்துக்கொள்ள முடிவதாகக் குறிப்பிடப்பட்டுள்ளது.

உலகச் சந்தையில் எரிபொருள் விலைகள் அதிகரிக்கும்போதும், இறக்குமதிச் செலவுகள் உயரும்போதும், நட்டத்தைச் சந்தித்துக்கொண்டு எரிபொருளை விற்பனை செய்வதற்கு தனியார் நிறுவனங்கள் தயாராக இருக்காது எனவும் தனநாத் பெர்னாண்டோ தெரிவித்துள்ளார்.

மீண்டும் எரிபொருள் வரிசைகள் உருவாகும் அபாயம்

தனியார் எரிபொருள் நிரப்பு நிலையங்களில் விலைகள் அதிகரிப்பதோ அல்லது விநியோகத்தில் தடைகள் ஏற்படுவதோ நிகழ்ந்தால், நுகர்வோர் அனைவரும் பெற்றோலியக் கூட்டுத்தாபனத்தின் எரிபொருள் நிரப்பு நிலையங்களை நாடக்கூடும். இதனால் மீண்டும் நீண்ட எரிபொருள் வரிசைகள் உருவாகும் அபாயம் காணப்படுவதாக அவர் எச்சரித்துள்ளார்.

அத்துடன், குறைந்த விலையில் பெறப்படும் எரிபொருளைக் கொள்கலன்களிலும் முச்சக்கரவண்டிகளிலும் சேமித்து, அதிக விலைக்கு விற்பனை செய்யும் கறுப்புச் சந்தை நடவடிக்கைகளும் அதிகரிக்கக்கூடும் எனக் குறிப்பிட்டுள்ளார்.

மேலும், கடந்த காலங்களில் எக்சொன் மொபில் (ExxonMobil) போன்ற சர்வதேச நிறுவனங்கள் இலங்கையை விட்டு வெளியேறியதைப் போல, தற்போதைய தனியார் நிறுவனங்களுடனும் முரண்பாடுகள் தீவிரமடைந்தால், வெளிநாட்டு முதலீட்டாளர்கள் இலங்கையிலிருந்து வெளியேறும் நிலை உருவாகலாம் என்றும் அவர் எச்சரித்துள்ளார்.

அட்வொகாட்டா முன்வைக்கும் தீர்வுகள்

இலங்கையின் பெட்ரோலியத் துறையில் நிலவும் பிரச்சினைகளுக்குத் தீர்வுகாண அட்வொகாட்டா நிறுவனம் பல்வேறு பரிந்துரைகளை முன்வைத்துள்ளது.

அவற்றில் முக்கியமானவை:

• சுதந்திரமான ஒழுங்குபடுத்தல் அதிகாரசபை: பொதுப் பயன்பாடுகள் ஆணைக்குழுவைப் போன்ற சுதந்திரமான ஒழுங்குபடுத்தல் அமைப்பின் கீழ் பெட்ரோலியத் துறையைக் கொண்டுவருதல்.

• சேமிப்பு மற்றும் சுத்திகரிப்பு வசதிகளைப் பிரித்தல்: CPSTL எண்ணெய் சேமிப்பு முனைய வசதிகளையும் சப்புகஸ்கந்த எண்ணெய் சுத்திகரிப்பு நிலையத்தையும் பெற்றோலியக் கூட்டுத்தாபனத்தின் ஏகபோக ஆதிக்கத்திலிருந்து விடுவித்து, அனைத்து நிறுவனங்களும் நியாயமான நிபந்தனைகளின் கீழ் பயன்படுத்தக்கூடிய சுதந்திரமான கட்டமைப்பை உருவாக்குதல்.

• நேரடி நிதி உதவி: எரிபொருள் விலைகளுக்குப் பொதுவான மானியங்களை வழங்குவதற்குப் பதிலாக, உண்மையில் பொருளாதார ரீதியாகப் பாதிக்கப்படும் குறைந்த வருமானம் கொண்ட மக்களை அடையாளம் கண்டு, அஸ்வெசும போன்ற திட்டங்கள் மூலம் நேரடி நிதி உதவிகளை வழங்குதல்.

இலங்கையின் எரிபொருள் சந்தையில் வெளிப்படைத்தன்மையையும் நியாயமான போட்டியையும் உறுதிப்படுத்துவதுடன், பொருளாதார ரீதியான கட்டமைப்புப் பிரச்சினைகளுக்குத் தீர்வு காண்பதே எதிர்காலத்தில் எரிபொருள் தட்டுப்பாடு மற்றும் நீண்ட வரிசைகள் மீண்டும் உருவாகுவதைத் தடுப்பதற்கான முக்கிய வழியாகும் என அட்வொகாட்டா நிறுவனம் வலியுறுத்தியுள்ளது.